दलित समाचार » दलित छात्रवृत्तिको रकम प्रअको खल्तीमा

सन्तोष थापा/पर्वत

दलित विद्यार्थीका लागि आएको दुई वर्षको छात्रवृत्ति रकम विद्यालयका प्रधान्ााध्यापकले दुरुपयोग गरेको खुलासा भएको छ ।

पर्वतको भोक्सिङ- ३ बाघमारामा रहेको शिवालय प्राविमा छात्रवृत्ति रकमबाट प्रअ दीपक मल्लले आफ्नै खल्ती भरेका हुन् । उनले आर्थिक वर्ष ०६४/६५ र ०६५/६६ मा विद्यालयका १६ जना दलित बालबालिकाका लागि आएको छात्रवृत्ति रकम वितरण नै नगरेको पाइएको छ ।

दुवै आर्थिक वर्षमा प्राथमिक तहका १६ जना विद्यार्थीले तीन सय ५० का दरले पाउनुपर्ने रकम विद्यार्थीलाई वितरण नगरी मल्ल आफैले खाएका हुन् । छात्रवृत्ति रकम अहिलेसम्म कुनै दलित विद्यार्थीले नपाएपछि अभिभावक तथा दलित अधिकारकर्मीले विरोध जनाएका छन् ।

आफ्ना छोराछोरीले पाउने छात्रवृत्तिको विषयमा पटक-पटक सोधपुछ गर्दा प्रअ मल्लले आलटाल गर्दै पन्छाउने गरेको अभिभावकको गुनासो छ । 'जहिले जाँदा पनि अल्मल्याउने काम मात्रै गर्दै आएका छन्,' नातिनीहरूले दुई वर्षदेखि छात्रवृत्ति रकम नपाएको गुनासो गर्दै अभिभावक तिलबहादुर विकले भने ।

जिल्लामा क्रियाशील दलित अधिकार निगरानी समूह, छुवाछूत निगरानी समूह, राष्ट्रिय दलित विकास संस्था पर्वतलगायतले गरेको अध्ययनका क्रममा कुनै दलित विद्यार्थीले छात्रवृत्ति पाउन नसकेको देखिएको हो । स्थानीय अभिभावक र शिक्षकले समेत रकम वितरण भएकोबारे अनभिज्ञता दर्शाएका थिए ।

'विद्यालयका अध्यक्षलाई नै छात्रवृत्ति रकमसम्बन्धी कुनै जानकारी छैन,' अध्ययनपछि फर्केका दलित अधिकार निगरानी समूहका संयोजक लालबहादुर हरिजनले भने ।

उक्त छात्रवृत्ति रकम लक्षित समूहमा पुर्‍याउन प्रयास गरिएको र जिल्ला शिक्षा कार्यालयले समेत स्रोत केन्द्रका प्रतिनिधिमार्फत अध्ययन अनुसन्धान गरेर निचोड निकाल्ने आश्वासन दिएको राष्ट्रिय दलित विकास संस्थाका अध्यक्ष उद्वीर नेपालीले बताए ।

श्रोत: नयाँ पत्रिका, २५ कात्तिक २०६६