उपप्रधान तथा गृहमन्त्री कृष्णबहादुर महराले दलित समुदायको उत्थानका लागि बादी विकास समिति गठन गरिने बताउनुभएको छ ।

 सोमबार आयोजित कार्यक्रममा बादी विकासका लागि आगामी आर्थिक वर्षको बजेटमा पार्न आफूले प्रधानमन्त्री र अर्थमन्त्रीसँग कुरा राख्ने आश्वासन दिनुभयो ।

  बादी महिलाहरुको मुद्दा हेर्न मन्त्रालय र प्रहरी प्रधान कार्यालयमा अलग्गै एकाइ गठन गरिएको जानकारी दिँदै मन्त्री महराले चाँडै ७५ वटै जिल्लामा यस्तो एकाइ गठन गरिने बताउनुभयो । राज्य जातीय छुवाछूत र सामाजिक विभेदको अन्त्य गर्ने लागि गरिरहेको भन्दै गृहमन्त्री महराले बादी समुदायविरुद्ध बनाइएका विभिन्न रीतिरिवाज, धार्मिक संस्कार एवम् सामाजिक मूल्य मान्यता परिवर्तन गरिनुपर्नेमा जोड दिनुभयो ।

कार्यक्रममा सभासद् हरि सिपालीले बादी समुदायका महिलाहरुको मुद्दा दर्ता गर्न प्रहरी प्रशासनले नमान्ने गरेको भन्दै समग्र बादी समुदायको उत्थानका लागि बादी विकास समिति गठन गर्नुपर्नेमा जोड दिनुभयो ।

   बादी महिला राष्ट्रिय सम्मेलनकी संयोजक निर्मला गुप्ता -बादी) ले बादी समुदायको आन्दोलनलाई राजनीतिक दल र सरकारले बेवास्ता गरेको भन्दै आपत्ति जनाउनुभयो ।