मञ्चका उपाध्यक्ष सुशिल खड्काको सभापतित्वमा सम्पन्न सो कार्यक्रममा प्रमुख अतिथि एकीकृत नेकपा-माओवादी) का पोलिटब्यूरो सदस्य तथा संविधानसभाका सभासद नारायण प्रसाद पौडेल हुनुहुन्थ्यो भने विशेष अतिथिमा नेपाली राजदुतावास दोहा कतारका महामहिम राजदुत डा. सुर्यनाथ मिश्र हुनुहुन्थ्यो ।

त्यसैगरी अतिथिहरुमा नेपाली जनप्रगतिशील मञ्च, कतारका सल्लाहकार संयोजक उमेश बराल, गैरआवासीय नेपाली संघ, अन्तर्राष्ट्रिय समन्वय परिषदका उपाध्यक्ष्य सागर नेपाल, लोकतान्त्रिक मञ्चका सचिव रामजी गिरी, नेपाल आदिवासी जनजाति महासंघका अध्यक्ष मानबहादुर साँवा लिम्बु, सेफ्टी अवारनेसका राधाकृष्ण देव, समाजसेवी तथा व्यवसायी टिवी कार्की, नवोदित साहित्यिक मोवाइल पुस्तकालयका ईश्वर दाहाल लगायत अन्यको पनि उपस्थिति रहेको थियो ।

नेपाली जनप्रगतिशील मञ्चका सचिवालय सदस्य कृष्ण भट्टराईबाट स्वागत मन्तव्य दिईएको थियो । कार्यक्रमका प्रमुख अतिथि नेकपा माओवादीका पोलिटव्युरो सदस्य तथा सभासद नारायण प्रसाद पौडेलले आफ्नो मन्तव्यको क्रममा देशमा राजनीतिक परिवर्तन ल्याउन राज्यका नागरिकहरुले ठूलो वलिदान दिएको स्मरण गर्दै यो यथार्थलाई कसैले पनि भुल्न नहुने बताए । शान्तिपूर्ण रुपमा संविधान बन्न नसकेको कुरामा अरु दलहरुले गरेको खिचलोप्रति चिन्ता व्यक्त गर्दै राज्यमा स्थिर राजनीति र संविधान सभा बहाल हुन नदिने प्रयासमा एमाले र काँग्रेसले गलत चाल खेलिरहेको आरोप लगाए । देश र जनताको हितका लागि जति राम्रो कदम चाले पनि भारतीय विस्तारवादको सहयोगमा अन्य दलले हस्तक्षेप गरिरहेकोमा चिन्ता व्यक्त गरे । आफ्नो पार्टीभित्रको नेतृत्वमा विचलन आएपछि कम्युनिष्टहरुलाई विघटन गर्ने र नामेट गर्ने काम भएको इतिहासले प्रष्ट पारेको हुँदा यसमा सचेत रहनु पर्ने कुरामा जोड दिएका थिए । राजनीतिक संगठनको पंक्तिमा नेपाल जनप्रगतीशील मञ्च दोहा कतारले अग्रणी भूमिका खेलेको सुनेको र हाल आएर प्रत्यक्ष रुपमा शोषित पीडित श्रमिक मजदुरहरुलाई उद्धार गरेको खबरले आफु धेरै खुशी भएको बताए । संगठनलाई विभिन्न ढंगबाट वर्गीकरण गरी क्षेत्रगत रुपमा पुर्‍याएको योगदानलाई आफ्नो माउ पार्टीले सधैँ सकारात्मक रुपमा लिने छ भनी बताए । स्पष्ट दृष्टिकोणको कारण नेपाली नियोगले धेरै राम्रो काम गरेकोमा सराहना गर्दै श्रमिक मजदुरको हक हितको लागि खाडी राष्ट्र तथा मलेशियामा यस्तै जुझारु नियोग प्रतिनिधि भएमा श्रमिकहरुले धेरै राहत पाउने थियो, उनले बताए । उनले अन्त्यमा स्वार्थ भन्दा माथि उठेर श्रमिकको हक हित र अधिकारको पक्षमा लड्ने श्रमिक समस्याका चिन्तक महामहिम राजदुत डा. सुर्यनाथ मिश्रमा पनि हार्दिक आभार प्रकट गरेका थिए ।

कार्यक्रमका विशेष अतिथि महामहिम राजदुत डा. सुर्यनाथ मिश्रले भन्नुभयो, कतारसंगको मैत्री सम्बन्ध सन् १९७१ बाट भएको स्मरण गर्दै त्यसैको फलस्वरुप अहिले कतार नेपालको श्रम सम्झौता मार्फत नेपालका नागरिकहरुले संख्यात्मक आधारमा लाखौँको संख्यामा यहाँ आएर रोजगारी पाएको कुरा बताउनुभयो । देशमा जनशक्ति हुँदा हुँदै पनि देशको राजनीतिक अस्थिरता तथा आर्थिक दुरुहताको कारणले विकासका सम्भावना धेरै हुँदाहुँदै पनि पछि पर्नु परेकोमा चिन्ता व्यक्त गर्नुभएको थियो । नेपाल अधिराज्यभरि ८५००० मेगावाट विद्यत क्षमता हुँदहुँदै पनि हालसम्म जम्मा ५००० मेगावाट विद्युत मात्र उत्पादन भएको र राज्यभित्र खपत भैरहेको त्यो बिद्युत शक्ति नागरिक तथा उद्योगधन्दाका लागि पर्याप्त नभएको बताउँदै यस्ता विकास निर्माणमा सरकारले अवसर दिएमा विदेशमा आर्जन गरेको शीप र श्रोतले नेपाल उज्यालो हुने थियो उहाँले बताउनुभयो ।

उहाँले कुल रेमिट्यान्सको ३५ प्रतिशत मध्ये २१ प्रतिशत कतारले धानेको अवस्थामा कतारको हक हित र श्रमिक अधिकारका लागि नियोगले बटुलेको अनुभव र सुझाव सरकार पक्षबाट आधा अंश मात्र लागू गर्न सकेमा नेपाली श्रमबजारको भविष्य कतारमा धेरै राम्रो रहने र दोव्वर रेमिट्यान्स भित्र्याउन सकिने कुरामा ठोकुवा गर्नुभयो । एजेन्ट तथा दलालहरुका कारण तथा अन्य कारण गतबर्ष मात्र सिआडी मार्फत ३२ हजार नेपाली नेपाल फर्किएको आँकडा प्रस्तुत गर्दै उहाँले १७८८२ को संख्यामा मानसिक रुपले विक्षिप्त कामदारहरु रहेको कतारस्थित हमद मेडिकल कर्पोरेशनबाट प्राप्त तथ्यांक पनि पेश गर्नुभएको थियो ।

गैरआवासीय नेपाली संघ अन्तर्राष्ट्रिय समन्वय परिषदका उपाध्यक्ष सागर नेपालले आफ्नो मन्तव्यको क्रममा नेपालको सरकारले लेवर खपत गरी त्यहि आर्जित रेमिट्यान्सबाट जिवीका गर्ने सरकार भएको देश भनेर आफुलाई सावित गरी विश्व बजारमाझ चिनाउन चाहेको बताए । देशका लागि हामी केहि गर्छौ भनेर हिँड्ने लगानी गर्न सक्षम र इच्छुक गैरआवासीय नेपालीहरुलाई अवसर दिनुपर्ने ठाउँमा विभिन्न कुराहरुको मुद्दा बनाई आक्षेप पटाक्षेप गरी धकेल्ने धृष्टता गर्नु पक्कै पनि राम्रो अभियान होइन भन्नुभयो । कसैको एकल निर्णय र अभियानले देश त परै जावोस समाज हाँक्न पनि असम्भव भएको हुँदा यस्तो अभिमान कसैले नपाले हुन्छ भन्दै समाजलाई केहि दिन्छु भनेर हिँड्ने क्रममा, व्यवसाय गर्ने क्रममा तथा राज्यको सर्वाङ्गीण विकास र उत्थानको लागि कोहि कसैबाट भएका कमी कमजोरीलाई औँल्याएर सुधार्ने र सुध्रने अवसर पाउनु पर्छ भन्नुभयो । त्यसो गरेमा मात्र उद्देश्यले सार्थकता पाउनेछ उनले भने । हामी देशका लागि केहि गर्न चाहन्छौँ भनेर पटक पटक जिकीर र प्रतिबद्धता सरकार समक्ष गर्दै अवसर प्रदानको लागि अनुनय गर्दा पनि सरकार पक्षबाट बेवास्ता गरिदै आएकाले अब सरकारले यसै गरेर नेपालीहरुले कति बर्षसम्म विश्व भूगोलमा देश छोडेर बस्नुपर्ने हो त्यो पनि स्पष्ट नीति पेश गर्नु जरुरी रहेको छ उनले भने । जुनसुकै वैचारिक संगठनमा लागेर आफुलाई डोर्‍याएर हिँडेपनि आखिर सबै नागरिकको चाहना भनेको देशमा शान्ति, सुव्यवस्थता वहाल हुनुपर्छ भन्ने भएको हुँदा सबैले आ-आफ्नो क्षेत्रबाट एउटै आवाज लिएर अघि बढेमा असम्भव भन्ने कुरा केहि नरहेको बताए ।

नेपाल आदिवासी जनजाति महासंघका अध्यक्ष मानबहादुर साँवा लिम्बुले नेपाली श्रमिकहरुको मामिला र विद्यमान बाधा, अड्चन तथा कठिनाईमा प्रत्यक्ष सरोकार राख्ने काममा नेपाली जनप्रगतीशील मञ्च अग्रपंक्तिमा रहेको बताए । मूलुकका लागि चिन्ता व्यक्त गर्नेहरु मूलुकबाहिर रहनेहरु मात्र रहेको बताउँदै देशको वर्तमान राजनीतिक अराजकताले ग्रस्त देशको अवस्था स्पष्ट देखाएको छ भन्दै प्रथम चरणको अवस्थामा संविधान सभा निर्माण हुन नसकेपनि थप अवधिमा संविधान निर्माण कार्य देशका सबै दलले मिलेर गर्नुपर्ने कुरामा जोड दिँदै अन्यथा नागरिकले कुनै पनि दलहरुलाई कहिलै विश्वास नगर्ने बताए । लिम्बुले अब बन्ने संविधानमा आदिवासी जनजातिको हक, अधिकारको सुनिश्चितताको बारेमा पनि स्पष्ट कुराहरु समावेश हुनुपर्ने कुरामा उनले जोड दिएका थिए ।

नेपाली जनप्रगतीशील मञ्च दोहा कतारका सल्लाहकार संयोजक उमेश बरालले सांसदलाई किनबेच गर्ने काम एमालेबाट सुरुभएको हुँदा आफ्नो फाइदाका लागि जुनसुकै अहितकारी कदम चाल्न पनि एमाले पछि नपरेको बताए । ८१ प्रतिशत कृषि पेसामा संलग्न भएको देशमा भारतसंग जल सम्झौता गरी देशलाई ठूलो नोक्सानी पुर्‍याएको अवस्थामा अन्य दलहरु र त्यसका कार्यकर्ताहरुले कानमा तेल हालेर बसेको उनले बताए । उनले यसबाट क्षणिक राजनीतिक लाभ लिने क्रममा देशलाई ठूलो आर्थिक तथा प्राकृतिक नोक्सानी पुगेको कुरा बताए । यदि नेकपा माओवादीले एकमना सरकार बनाउन पाएमा देशको सर्वाङ्गीण विकासको लागि नेताहरुले कस्तो भूमिका खेल्नुपर्छ भनेर उदाहरण देखाईदिने थियो उनको भनाई थियो । अंग्रेजसंगको युद्धमा वीरवलभद्रको योगदानलाई मात्र मुलुकव्याप्त बनाएको र त्यत्तिकै ऐतिहासिक योगदान पुर्‍याउने चाङ्ले सार्कीलाई राज्यले दलितको नाममा बिर्सिदिएको बताउँदै दलितमाथि राज्यपक्षबाट किताबी रुपमा समान भनेर उद्घोष गरेपनि छुवाछुत र हेप्ने प्रवृतिबाट दलितहरुले छुट्कारा नपाएको बताउँदै जातिय विभेदको मामलामा आफ्नो संगठन जहिले पनि समानताको व्यवहार गरिनुपर्छ भनेर लागि परेको बताए ।

त्यस्तै गरी अन्य बक्ताहरुमा समाजसेवी तथा व्यवशायी टिवी कार्की, सेफ्टी अवरनेसका राधाकृष्ण देव लगायत अन्यले पनि आफ्नो राय व्यक्त गरेका थिए । नेपाली जनप्रगतीशील मञ्च दोहा कतारका उपाध्यक्ष तथा सभापति शुसिल खड्काले नेपाली जनप्रगतीशील मञ्चले नेपाली श्रमिकहरुको मुद्यामा पुर्‍याएको योगदान र आफ्नो भावी योजना सवै माझ पस्कने योजना अनुरुप तथा नयाँ समिति निर्माणको लागि आयोजित विधिवत महाधिवेशनमा उपस्थित भएर सफल बनाउने सवैमा धन्यवाद व्यक्त गरेका थिए भने उक्त कार्यक्रमको सञ्चालन मञ्चका महासचिव हरि नेपालीले गरेका थिए ।