पर्वत/बैशाख २८, जिल्ला शिक्षा कार्यालय पर्वतले गत शैक्षिक सत्रमा ९० लाख बरावरको छात्रवृति वितरण गरेको छ । प्राथमिक विद्यालयमा अध्ययनरत् दलित १० हजार १३६ छात्रछात्राहरुलाई छात्रवृत्ति वितरण गरिएको छ । सरकारले निर्धारण गरेको विशेष लक्षित समूहका लागि छात्रवृत्तिअर्न्तगत दलित र राष्ट्रिय दलित छात्रवृत्तिअर्न्तगत छात्रवृति वितरण गरेको जिल्ला शिक्षा कार्यालयका विद्यालय निरीक्षक रामचन्द्र तिमिल्सिनाले बताए ।

दलित छात्रछात्राहरु मध्ये ८५ प्रतिशतले छात्रवृत्ति पाएका थिए । प्राथमिक तहमा ५ हजार ४ सया ३ जनाका लागि १७ लाख ७० हजार ४० रुपैयाँ वितरण गरिएको थियो । निमावि तहमा २ सय २७ जनालाई ४ लाख ८ हजार रुपैयाँ वितरण गरिएको थियो । निमावि र माविका तहमा दलित बालबालिकाका लागि पाठ्यपुस्तकका लागि ७ सय ५४ जनालाई ३ लाख १ हजार ६ सय रुपैयाँ, सोही तहमा स्थानीय छात्रवृत्तिअर्न्तगत ९ सय ५० जनालाई जनही १ हजार ७ सय रुपैयाका दरले १६ लाख १५ हजार रुपैयाँ र माध्यमिक तहमा अध्यायन गर्ने नौ जनालाई ३४ हजार ५ सय रुपैयाँ बराबरको छात्रवृत्ति वितरण गरिएको शिक्षा कार्यालय पर्वतले जनाएको छ ।

उच्च मावि तहमा अध्ययनरत नौ जना जेहेन्दार, चार जना दलित, चार जना आर्थिकरुपले पिछडिएका र चार जना जनजाति गरी २१ जनालाई १ लाख ५ हजार रुपैयाँ , २८ जना द्वन्द्वपीडित बालबालिकालाई ९४ हजार रुपैयाँ र दुई जना सहिदका छोराछोरीलाई ३० हजार रुपैयाँ बराबरको छात्रवृत्ति वितरण गरिएको थियो ।

जिल्लामा गैरसरकारी क्षेत्रबाट प्लान नेपालको सहयोगमा पर्वतमा ११ लाख ९० हजार रुपैयाँ बरावरको छात्रवृत्ति प्रदान गरिएको छ । यसमा मावि, निमाविमा अध्ययनरत ४ सय ९७ जना र अपाङ्ग ४ सय ६२ जनालाई छात्रवृत्ति वितरण गरिएको थियो । उच्च माविका १७ जना दलित विद्यार्थीहरुलाई ५ हजारका दरले ८५ हजार रुपैयाँ र तीन जना अपाङ्ग विद्यार्थीहरुलाई १० हजारका दरले ३० हजाररुपैया दिएको ग्लान नेपालका घनवहादुर लम्सालले भने । असल छिमेकी सहयोग संघ (गोनेसा) ले वाषिर्क रुपमा १५ हजार रुपैयाँ बराबरको छात्रवृत्ति द्वन्द्वपीडितका परिवारका विद्यार्थीलाई वितरण गरेको कार्यक्रम संयोजक शिव सुवेदीले बताए ।