दलित समाचार » दलित र गैरदलितबीचको विवादका कारण चार वर्षदेखि मन्दिरमा ताला

पर्वत/ हुवास गाविसस्थित एउटा मन्दिर दलित र गैरदलितबीचको विवादका कारण चार वर्षदेखि बन्द रहेको छ । स्थानीय दलित बालबालिकालाई मन्दिर प्रवेशमा रोक लगाएको विषयमा विवाद भएपछि मन्दिर बन्द भएको थियो ।

गैरदलित बालबालिकासरह आफ्ना बालबालिकालाई मन्दिर प्रवेश तथा पूजाआजा गर्न दिनुपर्ने दलित समुदायले माग गरेपछि कालिका मन्दिर बन्द भएको हो । दलितहरूको मागपछि गैरदलित समुदायले विद्यालयमा रहेको मन्दिरमा ताला लगाएका थिए ।

अधिकारका लागि दलित महिलाले गाउँमा आन्दोलन गर्दै आए पनि गैरदलितले मन्दिर प्रवेश गर्न रोक लगाएको स्थानीय दलित महिला अधिकारवादी रोजिना हिताङले बताइन् । 'दलितलाई माथि उठ्न दिनुहुदैन, उनीहरू माथि पुगे भने हामीलाई हेप्छन् भन्ने सोचाइ गैरदलितमा छ,' उनले भनिन्, 'परम्परादेखि दलित र उत्पीडित वर्गको अधिकारका लागि बाध्य भएर आन्दोलनमा उत्रेका छौँ ।'

०६२ सालको श्रीपञ्चमी (सरस्वती पूजा) का दिन आफ्ना बालबालिकालाई पनि अन्य बालबालिकासँगै मन्दिरमा पूजा गर्न दिन माग गरेका थिए, दलितहरूले । तर, गैरदलितले दलित बालबालिकालाई रोकेका थिए ।

Source: www.nayapatrika.com